呢個自制情景模型係我上兩個星期做來送比我以前高一時的班主任的結婚禮物,做完第二日即刻返澳門去觀禮送比佢
今次都係冒住比大家插先放出來,因為我都覺得今次係各方面都做得好差....
講返呢個情景本身的制作,可以話係無精神,無時間,無技術的一次制作,自制一個情景模型,從構圖到落手制作全部都係自己做出來真係唔係一件易事,更可況對我呢個自制白痴來講真係一個大挑戰,今次都係因為要送一份結婚禮物比班主任先有動力去完成今次的全自制情景作,所用的時間都好多,特別係情景中的兩個人仔,做左好多次嘗試先完成,所以令到整個制作速度減慢左好多....所以先令到今次我又再一次趕工制作....
先說地台,係一德路行街見到十蚊一個的模型盒,所以買左一個返來~~用發泡膠cut左個情景的大約形狀,之後就用石粉粘土包住舊發泡膠,大約個初形就完成左啦~~
而上面的草係用左麻繩來做,因為以前試過用草粉,但痴唔實而且又好似唔多似草咁,所以今次嘗試用麻繩啦,出來的效果同自己所想的都有好大分別......都用丙烯顏料油過下個地台,但唔知做咩我唔記得油完先痴草....最後痴完草先記得油,搞到好核突......
而那兩棵樹都係我第一次整,用一支牙籤做左適當的開叉處理,再預先油好左d丙烯顏料再用白膠漿痴o個d唔知咩上去(上次係一德路買的)出來的效果竟然比我想像中要好,第一次算係咁啦~~
重複做多一棵~~
兩個人仔就真係令我好頭痛,我本身又唔識雕刻,又唔識點整個公仔出來,所以最後問左朋友借左一個小kururu比我,用自由矽膠copy,失敗左好多次,次次都係copy得唔好....而且開頭用原子灰,copy出來的件都好易爛....最後練習左好多次做模之後就決定改用造型畢地去copy啦,最後出來效果唔係太好,仍然有落差位,但總算係咁多次中最好的一批件,所以就用上了這些件,因為有好多落差位,所以手手腳腳都全部做過好多修改,做返好個形,身體同手腳問題都不大,只係個頭先最多問題,真係唔知點搞好,copy到大約形狀就算,鑽左兩個洞當眼,個頭用麻繩當頭髮去遮住個頭的核突位,仲要唔知點噴,噴左白色就算,完全分唔到男同女....個頭的色同d草的色又一樣.....原本都想同d草噴埋綠色的,但最後真係太眼訓,開左幾晚通頂去做....頂唔順先去左訓覺.....
講得太多啦
都係去圖啦....
分享
