https://www.youtube.com/watch?v=SQRbMws6nk0
距離1/60 PG Unicorn高達正式發貨的日子大約只有不到一星期，相信唔少已經訂貨嘅朋友都等得非常心急。咁啱呢兩日Bandai香港收到來自日本嘅素組完成品，筆者梗係第一時間狗衝上佢哋Office同大家睇睇呢隻獨角獸有幾正啦！
到達Bandai香港Office，相關同事已經準備好一隻Unicorn Mode嘅Unicorn高達等住筆者，筆者第一個感覺係：「冇想像中咁大隻啫…」因為Unicorn高達理應係最高大嘅MS之一，不過筆者忽然又想起，進入咗Destory Mode佢係會「增高」咗，所以都係唔好咁快下結論。癈話唔講咁多住，不如大家一齊睇睇相：（留意以下只係素組效果，連線都未上）
今次PG Unicorn高達另一個賣點就係擁有全身發光LED（另購），連眼部共有32個發光點。比較特別係其實呢啲LED本身係藍光，但照到Unicorn高達身上透明部件就會分別發出綠光（眼部）同紅光（其他透明紅部份），今次終於真真正正可以將Unicorn高達特別精神感應效果重現大家眼前，所以除咗你極唔鍾意用台座（因為電池設於台座）又或者只打算砌成Unicorn Mode，否則真係冇其他理由唔買埋呢套LED。
總結
請容許筆者先戴定頭盔講，今次呢個只係素組完成嘅作品，而且未付有任何武器，所以以下只係筆者初步感覺，只供大家作初步參考而未必完全可以作準。老實講呢隻PG最起初畀到筆者感覺只係單純「MG放大版」，主要係因為刻紋冇特別多咗，全身亦冇太多明顯精細化之處，不過對於要「爆開發光」嘅Unicorn高達來講呢方面算係情有可原，畢竟「爆開」後如仍留有大量慘了灰色線的花紋，感覺反而有啲怪。筆者本來預期响呢隻1/60大比例嘅模型上「變形」會有較多嘅連動（例如拉動一個部位就可以令整隻手「爆開」），但實際係完全冇，基本上所有位置都需要人手逐個拉開，呢點真係令筆者有啲失望。
筆者以往一直都覺得大部份PG系列高達對腳都唔及MG版（同一高達計）咁修長，而且腳掌往往都造得較大（因為咁先企得穩），不過今次Unicorn高達身形比例造得非常好，可能一來本身設計已經好好，二來亦冇大型背包嘅負擔。雖然前面筆者提到似乎唔太夠精細，筆者覺得呢隻Unicorn高達其實係「正在骨子裡」。
首先筆者留意到白色外甲位置似乎唔太睇到有水口位（唔通預咗會出電鍍色！？），不論對於愛素組嘅朋友定還是會加工上色嘅朋友都可以節省到好多工夫。另外唔可以唔提嘅當然係新增嘅「Destory Unchained」模式，雖然爆開咗呢個模式可以擺嘅甫士肯定少咗，但如果配合發光LED睇起來感覺就會比普通Destory Mode更加「耀眼」，老實講如果冇呢個「Destory Unchained」模式，套LED發光感覺肯定失色不少。
今次Unicorn高達雖然本身定價並非PG中最高，但如果計埋套差不多可以話必買嘅LED就肯定係暫時最貴一隻。至於你話抵唔抵買，筆者親身玩過後覺得算係可以接受，不過暫時未知LED套件到時會唔會被炒起太多（筆者聽聞好多舖都早已截訂），如果你未訂到，就真係要睇緊啲邊日正式到貨喇∼
提外話：PG Unicorn Gundam專用FA套件已經於Premium Bandai Online Shop開始接受預訂，最重要係套作內會附送一張同樣由KATOKI HAJIME設計o既水貼，會同PG本體跟果張貼紙花紋唔同，大家可以訂咗等埋先諗下用邊張。
by 高登
分享
