我好鐘意砌高達 不過真係乜都唔識 屋企都有幾部 但係都係就咁砌
跟住果 D線位都係用果支GUNDAM MARKER黑色 油性 極細 畫
D水口位我會用果 D沙紙磨 不過我唔識磨 磨極都係有點白色 有時 藍色紅色黑色果 D件又會 磨花埋個面
咁我應該點做呢? 我係用手扲住張沙紙磨 GA

如果我新手上路 應該要有咩基本用具
同埋我要學左D乜先

求教

首先學左搜尋功能 你想要咩都搵到!

同埋 如果你想唔上色(噴油) 情況底下完成

睇下電擊會好好

果 D花痕 只要跟住號數 400~>800~>1000  就會無左  加多一層灰就直頭無埋!

見到3樓果位  我加多d 搜查字  上水貼 ，滲線，消光

要做得好  爬文係最好~除左俾錢去學...

練多d就ok~  我都係自學番黎

[ 本帖最後由 七夜 於 2011-2-21 03:11 AM 編輯 ]

我都唔係玩左好耐, 我都係過來人, 但見你問呢類問題就幫下你, 因為多數都無咩人會答呢類可以用搜尋功能搵到既問題......

長玩既話就要練穩D基本功, 開頭既就係好似你而家做緊既野, 消水口, 夾口(試下搜尋下呢D字先,問D論壇有既野無咩人會答你,要學野係需要主動D)

打磨方面, 有水磨同乾磨沙紙, 照字面譯, 水磨砂紙都可以乾磨, 不過會易爛D. 加左水會滑D,耐用D, D灰又唔會飛到周圍都係.
另外砂紙有分粗幼, 數字月大月幼, 由幾百至幾千都有,上萬的就要問其他師兄了, 我只知打磨膏就夠上萬.
打磨到白白地係一定有的, 試試在你的面上磨幾磨吧  但當你磨到大號D既砂紙就理論上月黎月少白色既野(花痕/粉), 試下幾蚊雞去買幾陣大號D既返黎試下先.

有其他問題PM我吧, 我都比好多師兄幫過, 順便學識幫人, 不過教錯左唔好話我呀

[ 本帖最後由 nickytnickyt 於 2011-2-21 02:55 AM 編輯 ]

首先一樣野係. 呢到"鼓勵" 全隻上色既. 如果只打算畫吓d線就當完成既, 雖然砌模型係只要達自己要求就ok, 但呢度係唔會當你完成左既.

亦即係, 果 D "磨極都係有點白色, 膠面磨花左" 既問題, 對會全隻件上色既人來講, 根本唔係問題, 亦唔會去找辦法去解決, 就算有辨法, 都唔會浪費時間去搞.

第二就係你要問自己你想玩到咩野程度. 放幾多時間係模型度. 砌模型係要耐性同時間既. 只想整一兩隻成品就做大師既就唔好浪費自己時間啦.

第三就係你打算用幾多錢. 要砌一隻模型會用唔少工具, 有平有貴, 有d係必要, 有d係為方便.. 冇錢就儲. 個個人都要咁做架啦.

第四就係唔好未學行先學走. 人地砌得幾好係人地既事, 人地個玩咩唔等於你有能力玩. 你硬要玩冇人阻你既, 不過衰左就只可以怪自己. 幾時有能力就係當你唔洗問人都會知d步驟係咩既時間. 到時要問人都只會係當自己明知步驟o岩但都係整唔到既時候.

一般來講既"基本功" 最初係處理水口, 之後就處理夾口, 之後就上色前既表面處理(一般會噴水畢地/噴灰), 之後就上色, 之後就滲線, 之後就噴光油(保護油/消光/ 全光, 你點叫都好, 都係果個步驟)

水口估你都識點搞, 都係cut 完用砂紙磨返平既姐.

夾口就search 舊post 啦, 有教學, 不外都係用 畢地/ aa+爽身粉/ "必"膠水法 呢幾個方法. 新手就學識晒佢. 因為唔同時候會用唔同方法既.

噴灰簡單過唔簡單, 冇話有咩野要學, 最重要唔好噴得大厚同起砂既姐..

上色先係功力所在. 手油絕對係一門技巧. 噴亦唔等於容易. 各有要時間學既野.

滲線 search 舊post 啦, 有教學. 跟足個教學就唔會有錯. 出錯就係你既問題.

噴光油/消光 只要唔好噴咁厚, 唔好噴到起白就ok架啦.

[ 本帖最後由 VampireA 於 2011-2-21 04:21 AM 編輯 ]

最最最基本工具

筆刀/界刀
水口鉗
水磨砂紙 (400, 800, 1000)
模型膠水

呢d工具五金舖, 文具舖買就得架啦. 除左模型膠水之外, 我唔會係模型舖買水口鉗, 砂紙, 筆刀呢d工具. 連畫筆我都唔會(因為d quality 唔夠美術用品舖咁好)
要知道一樣野. 98%以上既模型用品原先都係工業用品來的. 工業用品唔等於質素會粗略過模型用既. 只係你知唔知邊度有比模型舖賣既更平更高質素既姐...


最最基本補夾口工具
畢地 (雙星 basic type , 又叫牙膏畢地)
aa膠 ( 用 "o-second" 啦. 正牌 aa 係mix 唔到爽身粉既)
爽身粉 (用"強生",  o-second mix 強生爽身粉係一定work既, 大部份人都用緊, 想用其他牌子既你當自己做實驗好了, 唔好問人點解mix 唔埋)

[ 本帖最後由 VampireA 於 2011-2-21 04:38 AM 編輯 ]

模型係理論與實踐並重,
要多去睇POST,多去留意,多去認識唔同技考,之後一定要親身試過,做過,練,先至叩做掌握到.

公欲善其事 必先利其器
首先你要有齊以上師兄所講GE基本工具
筆刀/界刀
水口鉗
水磨砂紙 (400, 800, 1000)
模型膠水

唔好諗住問指甲鉗得唔得啦,呢D工具係絕對唔慳得.

之後,開始練習基本功.以下全部都係一般BANDAI/壽屋塑料模型要處理.
1.水口
2.夾口
3.上底灰
4.上色

學好呢4樣野,件作品都己經有返咁上下水平
呢4樣野中,頭3樣都唔係太難,而且用ge錢有限.只要多練就OK.
最後上色,大致上分2種.
a.手油
技術好重要,
開油水同油ge比例要好好,
要油到冇咩筆痕留低,
要小心溶左底油同出界.
好多時都要用到MASKING TAPE
要花唔小時間去掌握,
好處係油細位比噴塗方便得多.
而且亦係做舊化常用的方法
所以都係要練手油.
價錢相對平D.


b.噴塗

i)噴罐
可以解決到筆痕問題,上色會比較平均.
適合大範圍上色,
多數都要有到masking tape.
不過,價錢好貴,完成1隻MG RX-78可能用上近$200油錢.

ii)噴筆,泵
長遠來說係最理想ge上色方法.
有噴罐GE好處,而且可以做到更多唔同效果(陰影,高光)
都係要用masking tape,
而且亦雖要練習去掌握噴筆ge技考.
價錢,最好預算約$1000買齊噴筆全套設備,包括抽氣裝置.....
但長遠計,就會抵過噴罐好多.

最後亦係最重要,就係請確定自己係唔係真係咁熱愛模型,我唔建議新手一開始買噴筆,最靚ge水口鉗等,工具.
最好係做到幾隻有清水口,補夾口,上灰,上色ge作品之後,覺得自己真係夠耐性,又算係掌握到D基本功,用個段時間儲下錢,先買貴野都都唔遲
因為頭幾隻作品一定唔會完美,總會有D失敗.所以真係接受到失敗,再去練習先至做得出正作.

要有耐性,計劃同毅力

當然,如果有任何模型上問題,我都係歡迎PM~

其實有心學的，最實際都係買本教砌模型的書黎慢慢研究（我都係甘學咋），商務同一些模型鋪都有架，續個問題黎答真係答唔嗮！加油！

[ 本帖最後由 timng 於 2011-2-21 11:31 AM 編輯 ]

如果屋企附近有模型鋪,去吹下水,我都會去問下野,有d模型鋪既老闆會好樂意吹水

應該學識點樣使用工具,沙紙,剪鉗,模型膠水,都分幾種,要學識適當運用,
唔係話一紙在手就亂咁磨架喎,剪鉗都有幾隻,價錢平貴都係一種指標,模型膠水總括好用o既一枝就夠,
至於去到上級小小就要筆買刀之類工具,其實暫時唔建議您用,好危險的...

我係路過架,
不過見到大家d意見, 都有所得著
多謝晒

明白晒`唔該咁多位!
我想知GA野已經知道左啦`