失業碩士變搶手貨
見成首份工 未即時應允 想見多幾份
攞綜援碩士梁健鵬與餐廳東主鄭煥盛（中）及店長郭先生會面後獲聘。 梁曙光攝
【本報訊】中大碩士生梁健鵬失業攞綜援故事廣泛流傳後，很多公司表示願意向阿鵬伸出援手提供工作，九龍灣一間茶餐廳昨日更安排他見工，阿鵬終打破兩年來困局，應徵侍應成功獲聘，老闆更提出可以即時上班，但阿鵬表示仍有數份工作等候面試，未有立即應承，要多三、四日時間考慮「做唔做」。 記者：梁曙光
餐廳東主鄭煥盛透露，前晚收聽電台節目知道阿鵬的故事，立即聯絡節目主持人李慧玲找阿鵬聯絡方法，「我想畀個機會佢，嚟餐廳做侍應，希望佢可以累積工作經驗，我唔介意佢騎牛搵馬」。鄭老闆昨早將具體工作性質及要求以短訊通知阿鵬，並相約他昨午 2時到店舖與店長郭先生會面。
朝七晚五放銀行假
梁健鵬的事件近日引起討論，他昨外出見工時，女學生 Elise要求合照留念。
阿鵬繼續以「見工西裝 Look」，手挽公事包赴會，他於約定時間 10分鐘前已到達餐廳，與郭店長會面約半小時後，成功通過面試，餐廳要求明確：「做侍應生，返朝七晚五，放銀行假，公司包兩餐，月薪 7,500蚊，手板眼見工夫。」兩年多來第一次見工成功，阿鵬感高興，亦感謝餐廳給予機會。
當眾人以為他會問何時可以上班時，阿鵬卻表示要考慮多三、四日，「因為有幾份工未見，我想了解邊份最適合我先作決定」。在旁的鄭老闆坦言，原本想阿鵬今日上班，他最後仍厚道稱：「唔緊要，你諗清楚先，餐廳歡迎你隨時加入。餐廳員工多數係後生仔，你可以學好溝通技巧，第日搵到其他好工可隨時走，我唔介意你騎牛搵馬。」
鄭又以自己故事勉勵阿鵬：「我最初做 Office Boy，第一份工月薪 300蚊，於九十年代返內地開拉鏈廠，建立自己事業，近兩年再進軍飲食界。」但阿鵬似未為所動。
店長郭先生形容阿鵬見工時表現尚可，但經常問及其他事情，似心不在焉：「佢應徵侍應，但問使唔使入廚房煮嘢？」郭表示，理解阿鵬失業兩年多，可能與時代脫節，「我已經有心理準備，將要求降低」。他認為只要肯學肯做，尊重上司，服從指令，做好侍應工作並不難。
今日去應徵補習社
郭店長透露他亦是大學畢業生，「我畢業時冇諗過會做飲食業，都係想喺商界發展，兼職做侍應時獲老闆賞識，委任為餐廳經理。𠵱家管理餐廳，都係管理工作，大學知識亦可以學以致用。」郭鼓勵阿鵬要先踏出第一步，「未必係理想工作，但可以吸收經驗」。
記者直接問阿鵬是否嫌棄做侍應，他否認：「仲有幾份工約我見工，好似聽日（今日）有補習社面試，跟住又有一啲文職工作，我想見晒啲工，睇吓自己最適合做乜先決定。」但他事後坦言想做補習社或文職工作多過侍應。阿鵬昨午又與社署人員會面，「佢哋問我有乜需要幫忙，好似租屋、綜援金夠唔夠使等，我好多謝各界關心我」。此外，本報昨日繼續收到多名讀者來電，表示有意聘請阿鵬工作，阿鵬一下子竟變成搶手貨，相信阿鵬也始料不及。
分享
