曾鈺成﹕民主非萬靈丹 青年論壇暗撐功能組
(明報)2010年5月4日 星期二 07:15
【明報專訊】究竟功能組別係咪要永久保留，除咗泛民之外，到𠵱家都無咩人夠膽表態。立法會主席曾鈺成噚日出席一個青年論壇時，有內地學生就向佢提出呢個問題，阿曾雖然身經百戰，但都話因為有成班記者在場，唔敢暢所欲言，否則一定會上晒報紙，同議員「隔空開火」。結果阿曾唯有避重就輕，只係「暗撐」功能組別。
憂直選議員只顧地區利益
阿曾話，每個地方嘅議會，都唔會係由單一選舉模式選出來，好似美國除咗有地區選出嚟嘅眾議員，每個州仲會有兩個參議員，兩組議員成日都互罵對方。香港情况都一樣，有時候地區直選嘅議員，都只係顧及地區利益，忽略咗香港整體同埋長遠利益。雖則無明言，但阿曾言下之意好明顯，就係功能組別可以平衡呢口的「地區利益」，至於同唔同意就由讀者自己判斷啦！
曾鈺成又話民主唔能夠解決所有問題，有民主嘅口地方亦唔見得無晒社會問題，如果社會只係一面倒崇尚多數服從少數，不尊重少數人意見，只會演變成「多數人暴政」。
講完香港，仲有後生仔問到中國一黨專政嘅敏感問題，阿曾當然唔會「出軌」，佢話照實際情况嚟睇，要中國馬上實施類似外國嘅政黨輪替，𠵱家仲未具備條件，即係共產黨可以繼續做「獨市生意」咁話。
.
興幸並未發生.
由此可見其之權術可等到家.
分享
