小弟每年都會 (想) 製作一副軍事情景, 而呢副係喺今年年頭開始製作, 到現在只係完成咗四份一 (砌下停下). 依家 post個製作過程出黎, 希望可以推動一下自己快D完成咗佢.

二次大戰末柏林戰役既尾聲, 對於一般德國軍隊來說, 戰爭其實已經失敗咗, 但係仍然有一些兒童加入納粹青少年軍團去抵抗外敵, 為納粹黨作出無謂既羲牲. 小弟覺得呢個題材好吸引到我, 所以想製作一副情景去表達當時既情況.

草圖 :
首先將構思繪於紙上, 將角色, 車輛, 建築物背景等元素安排到合理及所需既位置上, 唔需要畫得太過細緻, 表達到重點就ok. 呢個步驟好重要, 因為後續工作完全係根據草圖去製作同修改.
以下係情景既基本佈局 (圖一) :
背景 – 政府建築物. 為咗表達納粹青少年軍對納粹黨既忠誠, 所以用政府大樓作為背景. 而為增加情景既層次高低感, 建築物置於幾級石級之上.
車輛 – 被擊毀既坦克及一輛被棄置既民用車輛. 選用King Tiger坦克既目的係佢代表德國戰末最後裝甲力量; 被棄置既民用車輛係為咗配合當時環境所需的.
人物 – 主角 (納粹青少年軍團) 及配角 (一批於前線回來的傷兵). 納粹青少年軍團喺現今既模型市場上應該係無生產商出過既, 所以要自行製作 (好大鑊, 不過都無辦法, 唯有留待最後先至做啦!!!)
當草圖修改至滿意後, 便可以正式開工. (漫長製作旅程既開始… ….)

(待續... ...)

[ 本帖最後由 Joe_Lo 於 2006-10-23 10:06 PM 編輯 ]

Bingo!! 構思正是由呢套電影引發的!

註 : 因為呢架坦克喺年頭已經做起, 影咗唔係好多相, 所以製作過程唔可以寫得咁詳細, 請見諒.

田宮King Tiger Henschel Turret
補品 : King Tiger 蝕刻片, 金屬炮管, 金屬履帶等.

製作上最值得提係要如何表達戰損既效果, 方法如下
於前面同側面既裝甲上加上數個彈孔, 先用圓形鑽頭鑽在中彈處, 記住咪鑽穿呀! 少少凹就OK. 因為好小有King Tiger被敵軍既炮火正面擊穿, 多數係擊中履帶或者無燃料而被棄置. 然後用混合不地將彈孔周圍塑造出被高熱溶化既狀態. (圖二).
坦克上既工具扣全部換上蝕刻片, 然後將某部份做成戰損狀態. 另外炮塔兩邊用1mm銅線加上扣環. (圖三)
前面擋泥板用蝕刻片取代, 其中一邊亦做成戰損狀態. (圖四)
履帶換上金屬履帶, 其中一邊做成被炮火擊斷狀態. 另外前面, 側面裝甲同埋炮塔用不地做出金屬注造效果. (圖五)
加強全車既焊接紋. (圖六)
其他改造請看圖片. 記住唔好將戰損做得太誇張, 要適可宜止.


(待續... ...)

[ Last edited by Joe_Lo on 2006-3-27 at 10:58 PM ]

至於被棄置既民用車輛本來用ICM出品既Volkswagen, 點知去到相熟模型店見到有盒朱羅紀年代 ”亞佛士” 出品既1比32甲蟲車, 心諗橫惦都係做成被棄置既狀態, 用盒平D都OK. (亞佛士 – HKD4X.00, ICM – HKD2XX.00)

將甲蟲車做成被棄置既狀態, 方法如下

全車用開稀既不地做出锈漬同少少泥漬. (圖七)

將車門同車身分開 (圖八)

先將模型背部磿薄, 然後用蚊香弄穿車身同埋做D凹陷感. (圖九)

將前輪車軚部份去除, 後輪車軚加熱做成漏氣狀態. (圖十)

細節部份同破損玻璃窗待基本上色完成後才加上 (圖十一)


(待續... ...)

聽日你就知!!!

首先根據草圖將各種元素 (如坦克, 車輛同建築物), 嘗試擺出最好既位置, 然後決定地台尺寸. 小弟習慣用Foam Board 做地台底板, 因為佢比發泡膠硬淨, 又容易切割.
先用 Foam Board 做出地形, 然後加上建築物. 呢次用咗 “威靈頓” 出品既政府大樓,  品質都算唔錯, 又配合到主題, 唔洗自製咁煩 (其實係因為懶) .
石磚地面就要逐粒逐粒貼上去, 然後在履帶經過既地方弄破 (圖十三).
石級就比較麻煩, 先用 Foam Board 切出大小不一既磚塊, 然後加上石膏, 再用電動磨頭弄至石磚既模樣, 最後舖在石級上 (圖十四).
石級上既雲石地台係用膠片自製, 先將膠片切成多塊四方形, 用銼打磿至雲石皮模樣然後貼在地台上 (圖十五).
最後加上已上好基本色既建築物, 加些碎石碎磚頭在路旁然後油上基本色. 唔需要油得咁細緻住, 等到加上各種元素後才做全面修改, 可以令到色調更為統一 (圖十六).

[ Last edited by Joe_Lo on 2006-3-28 at 01:14 PM ]

D磚仔同碎石要自己做架! 不過好簡單. 紅磚可以用飛機木切成粒狀, 然後在面頭加上開稀咗既白英泥就得. 至於碎石就仲簡單, 將石膏扑碎揀 d arm 用咪ok囉!!!

唔會架! 你唔好用鋸, 用cutter慢慢cut出黎就ok!

我習慣將飛機木切成大小不一既長方形, 然後用牙簽逐粒痴住先油上開稀既白英泥, 最後先舖喺所需地方, 用呢個方法好處係可以做到每粒紅磚都唔同. 其實都唔係好繁複, 一次做一百幾十粒都係唔洗用一個鐘頭. 剩翻又可以下次再用, 試下啦!!
另外地面既石磚都可以先舖上石膏才刻出磚既紋路, 但係就好難做出破爛既效果.

二次大戰末期, 德國因為物資非常缺乏 (包括油漆), 所以多數坦克都無噴上迷彩, 或許只在防锈漆上加上少少迷彩. 咁arm見到上幾期Armour Modelling有位情景高手亦製作咗一副二戰末期既情景, 裡面既King Tiger亦係用呢種方法處理. 所以參考咗佢既塗裝方法.
首先將全車噴上防锈漆顏色 (小弟覺得 Armour Modelling 內既 King Tiger 過份鮮紅, 為配合情景所表達悲慘氣氛, 所以將整體色調調暗). 然後用沙黃色徒手噴上迷彩. 之後便做舊化工作, 我諗各位大哥比我更加熟手, 所以唔喺度班門弄斧. 另外中彈處用黑鐡色同銀色處理, 泥濘效果亦都唔好做得咁誇張 (假設此車只在最後巷戰中才參戰).

[ Last edited by Joe_Lo on 2006-3-28 at 04:09 PM ]

貼多幾幅圖比各位參考一下

擺架車上個地台睇睇先, 好緊張啊!!

多謝意見, 等我留意下先!!

要決定此車既顏色, 足足花咗我幾個星期. 原因係以我所知喺二戰末期, 德國既民用車輛通常都採用比較沉色 (例如黑色), 避免成為轟炸目標. 但係如果放喺呢副情景度, 就顥得過份沉悶, 而且好難突出主題. (因為主角正是企喺此車車頂). 為咗呢個問題, 又上網又周圍搜查資料, 睇吓有冇用過其他比較鮮艷既顏色. 攪咗成幾個星期都係無結果. 正當苦惱是忠於史實還是以自己心目中所想的較為好之時, 一位對車素有研究既友人對我講, 佢話此車喺當時確實有好多種顏色, 並唔係只得黑色 (需然多數都係黑色), 而且當時喺柏林城市穿梭既路軌電車亦係用橙黃色車身, 所以避免成為轟炸目標而將全部車輛轉為黑色或比較沉色係唔成立既. 就算將此車用其他顏色亦無從考究, 只要唔好太過離譜就無咩大問題. 經佢一說頓時茅塞頓開, 而此車既顏色問題亦得以解決.

將呢架車放埋落地台睇睇先

其實我覺得我都唔係做得好似, 不過都講下我個方法.

先用透明膠片裁出車窗外形, 用cutter cut出大概破裂形狀, 然後用尖咀鉗將破碎位置弄至不規則, 再喺玻璃中間位置用cutter隨意劃花, 最後用AA膠點在車窗上使其變白, 不過唔好過多, 少少ok (我覺得好過用噴筆噴), 效果就好似圖中所示.

不過呢方法都唔係十分之似, 如果各位大哥有更好既方法, 不仿post出黎分享下.

[ Last edited by Joe_Lo on 2006-3-31 at 12:36 PM ]

關於製作破碎既玻璃窗問題, 我諗真係困擾咗唔少模型製作人. 翻查好多模型書同網頁, 都係製作得唔係好似, 正如以下兩幅圖, 我就覺得麻麻地, 你哋又認為如何呢? 唔知有冇人可以post個比較好D既製作方法呢

註 :　以下兩幅圖片攝取於韓國模型書 "Battlefield"

很佩服matleung兄對事物考究的精神.

我也曾聽說過以前有人在交通意外中因頭部被窗框上的碎玻璃割掉而身亡. 但不知何時開始大部份車輛改為安全玻璃. 經matleung兄介紹的網頁得到更多有關這方面的知識. 感謝分享.

另外, 如果要製作現代汽車的玻璃被打破的情況, 相信比我現在所做的更難表達. (小粒狀散佈在車廂和車頭位置)

多謝你既意見. 我參考過D歷史圖片都係咁斷法. 不過仲要做好多修正, 到時個效果會順眼好多.

你既意見對我好有幫助, 我又點會怪你呢!
因為目前仲未將整體色調統一, 所以會有呢個感覺.  正如之前我所說先將各種單件 (地台, 坦克和車輛) 上基本顏色, 然後整合後再做統一色調. 而下一步就係做呢個工作.