"默默地為自己和自己喜歡的人付出,
盡自己能力去做,不要問回報及收獲,
把這個時代你認為最好的,最值得回憶的,與喜歡的人分享。
男人的浪漫和氣勢,就是如此簡單。"
-----------------------------------------------------------------------------------------------------------------
各位好,又見面啦。
原先係四月尾完成劣作新安州之後稍為休息下。
點知,突然其來既一個喜訊,就係我未婚妻升職之喜。(仲要係有房坐果隻~)
為左賀佢升職之喜,我諗應該要送返d野比佢既。
送現成野又好似無乜新意咁,所以決定砌返隻醒醒目目既模型放係佢公司都好喎。
(話到尾都係自己想過下手癮.... 一 3 一)
探完口風之後,得到以下結論係 :
一隻新到唔新,唔要舊化,唔要陰影,深色既"豬嘴人" ....
第一時間就會令人諗到係 "黑色三連星"。
太好喇 ~ 我有現貨呀,哇哈哈。
砌完搵個籍口買過隻都好喎。 (奸笑中。)
今次製作時間歷時三個月,正確黎講係兩個月。
經過一輪修正,打磨,又經過好多惡劣既天氣,打唔正既風球之後。
終於都趕得切喇。
而家比大家睇睇小弟既劣作....
今次係色彩上面運用在好多深色,亦都嘗試修正白色大脾既佈局。
令到整個造型同三連星既佈局更加深沉。
由於運用大量深沉顏色,要表達出氣勢同複雜較果。
當然亦都引入金屬件,細微部份用上有閃光較果既顏色襯托。
背包保留左原有既推進器部份,中間再加上金屬件,令到背部較果更加豐富喇。
進一步加強複雜感,首次嘗試將小腿內則分屍,保留內側既外框。
背部可以加建既地方少之又少,所以係用上顏色對比黎表現返個層次感。
話明係黑色三連星,但係用上純黑色既地方就只有渣古既特徵,左邊既釘釘膊頭。
因為純黑色好難表現到佢既線條,所以外甲都係用上自已調色既 Navy Blue。
基於未婚妻唔鐘意一隻模型有舊化同陰影既較果 ($%*&! ,唔識貨!!!)
為左加強佢既線條感同層次,
所以三連星下半身主要係針對比較單調既小腿,大腿而改動。
腰部既裙甲,上身既胸甲就用上大量既膠板進行改裝。
係加厚既膠板之間保留左空隙,自然變成左粗幼不一既線條喇。
今次比較得意既係武器修正,為左唔好令到三連星睇起上黎變得公式化。
所以今次我將渣古原有既武器改動 (我稱呼佢為 [鐵餅槍])。
仿照返60年代幾有名氣既武器,意大利黑手黨專用既 Thompson (卡邦槍)而改造出黎。
出較果我覺得都相當唔錯之餘,亦有返一種輕巧既感覺。
由於係送禮既性質,今次做法係同起樓一樣,由腳部做上去。
期間係一邊上色一邊修正細位,同埋以防係送禮期間遇到碰撞情況。
先將三連星較到自己想展現既角度之後,連同關節(手腕除外),用模型膠水黐實。
再進行最後一次修正。修正完成之後就拍底左以上既幾張相片。
最後,腳板底亦都裝上銅支固定位置就可以上架了。
完成品出現喇。 ^ O ^
今次要多謝自己識左好多年既兄弟班兼模型同好既寶貴意見。
係我上架之前,我幾個朋友都黎探我,順便作最後一次檢視。
有位對攝影好有研究既朋友,睇完小弟既劣作之後。
朋友以自己既手法,影左只此一張既作品。 (下圖)
最後佢問我 : "你有無諗過用佢黎參加電擊09 ?? "
我答左佢一句 : "一來,我覺得我唔夠班。二來,我會將最好既野比我太太。"
其實以上既相比各位師兄睇到既時候,
完成品已經送到我未婚妻既 Office 架喇。
佢睇完之後,剩係答左一個我最想聽到既答案...
就係 : "我以後都唔會阻止你砌模型架喇。"
YEAH !!! 可以喪買喇,KAKAKAA ^ O ^。
(EXIA ~ !!! 準備過黎爸爸度喇 ~~ 呵呵呵。)
多謝各位。