HY2M - MS-07B - Gouf
當我相隔接近20年再度拿起這盒模型, 只可以說, 所有回憶返晒來.
當年, 我係用罐噴完成這盒1/60. 最記得係噴完之後鼻水是藍色的.....自此以後, 我吾再用噴罐同買防毒面罩噴油.
之前完成了的1/60的老虎已經陪伴我差不多20年, 當年的作品早已經被天然舊化, 不過佢一直係我展示櫃中, 從來未有收起來. 我一直也很想將當年的PG, HY2M再砌一次, 不過每次到真係開工時, 總係覺得有好多不滿, 畢竟都係20年前的設計. 在上年年中的時候, 偶然見到上網有人放, 因為賣家已經開了及素組了頭部, 所以價錢相對便宜一點. 其實呢盒模型真係砌一盒小一盒. 有傳HY2M其實吾係B仔自己生產, 只係批版權同負責監督, 而本身間廠已經執左, 所以一直都無再販. 是真是假? 我不知道, 我只知道B仔一直無新的0079 1/60出, 我已經等了20年了.....再多一個20年, 佢出我都無能力砌. (不過佢出我都一定買)
係我完成柯柏文之後, 1/60老虎又成為我的點燈對象之一. 同模友吹開水, 竟然都幾一面倒係叫我砌呢盒, 好啦, 又開來玩下. (其實我開始懷疑我班模友本身係吾係好憎我). 開盒之後, 發現自己應該無能力製作好呢盒模型. 首先所有線位都極淺, 跟本吾加深刻線無可能滲到. 另外, 除左膊頭夾口, 其他夾口係補吾到, 又或者應該講係好難補. 我又吾識用開坑刀將佢扮本身的線.......
開工之後, 真係百感交集. 好的地方係全部大大件, 見光的水口都係Undergate, 打磨的時間大大縮短. 不過腰同頭個條喉管, 要逐粒搞. 膊頭做左無縫, 不過手上臂同腳就無能為力. 如果要做, 應該要砌埋再做遮蓋先得. 如果大家想用原裝燈, 組裝一定要跟足佢個步驟. 仔細睇完份說明書, 我放棄了. 我其實吾特別鐘意裝燈. 無錯, 對眼著粒係好好睇, 不過除左影相, 你有幾何會開燈? 吾開燈時, 對眼無色又好無神.....HY2M堆燈個位置又奇奇怪怪.....所以我都係噴埋算啦. 而家對眼中間噴左高光, 其實好靚.
每次砌老虎都吾知用邊隻藍好, 本來今次想用B3淺藍色, 不過諗下諗下又想用番正常的藍色, 所以就用呢個配搭. 今次成盒HY2M我都覺得做得吾好, 無力感非常之大. 唯獨係選色我非常滿意, 完全有番本身老虎而又吾係B3的感覺. 初初我係用0.3噴, 噴左一陣, 真係頂吾順, 拎支0.5出來噴, 好快就噴好噴滿. 跟住陰影高光先用番0.3. 其實呢類大大件, 真係要拎支0.5出來用. 而頭個24粒同腰個28粒, 我係逐粒打磨, 逐粒噴底色, 陰影, 高光, 主色再手油接駁位做黑色. 裝完之後, 實在太緊, 基本上接駁位係花晒. 好辛苦整好個型狀, 又要顧高光位連吾連貫, 定好晒我再手油花左的地方........所以對不起, 我吾搞條鞭了. 係度真係要感謝Andy師兄推介"反向夾". 係今次整條管好幫到手. 如果吾係, 我可能又要上夾, 又拆落來, 又要加blutek再上夾, 而家一次過做晒先拆, 方便好多.
講開括花件, 今次係最嚴重的一次. 我一向都吾噴灰, 之前都吾會咁易花, 今次真係細細力括都花, 只有提醒各位噴隻咬得實的灰了. 因為我吾裝燈, 組裝吾算難. 每日搞小小, 2個星期左右就完成了.
深藍 : 高達專用油 UC17
淺藍 : 高達專用油 UC14
銀 : Mr. Colour SM208
黑鐵 : GAIA-020
黑 : Mr. Colour C14
砌完呢盒, 完全感受到自己的技術有多不濟. 不過同時令我好想再試一次製作PG. 舊款的PG沒有今天RG個種碎裂的風格, 成盒噴完又另有一番味道, 清清地, 真係重拾童年回憶.
Full Size Photo link :
https://photos.app.goo.gl/fXn7BuxRbfhwnUdc9
#HY2M,#Gundam, #GOUF, #MS07B, #Gunpla