ATM-09-ST - Scopedog 裝甲騎兵
模型Group有一個裝甲騎兵齊齊砌的活動, 想起了一直收藏起來的Bandai 1/20 Scopedog, 於是報了名.
這盒模型都斷了貨一段好長的時間, 偶爾會係2手網見到. 當日我都吾係用好炒的價錢入手, 現在好像更小見了. 一直都未有的心肝去砌, 最大原因當然係愛不夠. 同埋我覺得狗狗無舊化都係奇奇怪怪, 所以就一直放係度. 剛巧今次有齊齊砌活動就順便完成佢.
參加了活動先知有咁多廠出過裝甲騎兵, 又有好多吾同比例. 真心講, 我無能力, 都無興趣去砌舊模, 對我來說是吃力不討好的工作. 不過睇完人地的作品, 真心只有讚嘆各路高手的功力, 將盒舊模發揮得咁好, 相比自己實在覺得自己好弱. 係吾係已經老了? 我無心機再去學好多新技巧, 所以我都係乖乖係度砌 Bandai的簡單模型, 自己砌得開開心心就算了.
講番盒模型, 一路剪件已經覺得設計非常用心. 細節滿滿. 最誇張係個駕駛倉, 真係detail到離譜. 同埋原來好多師兄都好睇重down form, 睇個駕駛倉.....我當然係無理, 素組放入去算了.......哈哈!
整個設計俾我好強烈MG 2.0的感覺, 內骨極其精細. 呢盒仲加上釘同倉架, 2層板的設計. 我當然就利用呢個機會將架同後板噴深綠色, 釘噴銀色去加多點detail. 你叫我自己逐粒油我就真係搞吾掂啦. 你分好件我去做就得. 完成之後, 整體感覺好"高達". 本身肥壯的狗狗拉高左. 個頭扁左, 個膊又高左. 雖然已經加左小小分色, 不過整體都好plain, 加埋水貼就好看點. 本來想貼01號機, 不過見到大魔黑色三連星張水貼....用02啦.
製作過程中, 真係驚喜不斷. 可惜當年都係吾受歡迎. 好快就腰斬個系列. 同RRR一樣, 出幾款就停. 聽師兄講好似當年負評不斷, 大概都係同原設偏離. 其實整個高達系列都係咁, 你睇下今日隻RX-78同原設的分別? 不過大家接受到高達增高, 變瘦卻又不接受狗狗外表改變. 可能就係吾想改變呢份情懷吧. 我沒有對原設個份愛, 我比較欣賞Bandai今次用心的設計, 希望Bandai再多一點新產品吧. 來緊HG狗我都會砌, 就咁睇同呢款係有明顯距離.
說一點點家事. 家中的外傭想在明年4月約滿回鄉了, 不經不覺已經6年. 其實我同太太一點都不想家中多個外人, 但當第2個小朋友出世, 我們沒其他選擇才請姐姐. 感恩的是姐姐沒有什麼奇怪的事, 其實我已經好滿足了. 再請一個又驚吾知係乜人, 同太太商議後都係吾請了. 也跟姐姐傾過, 可以再幫手多一段短時間, 等我個女9月上埋小學先. 講真我又無好吾捨得, 只係想起日後又要花好多時間在家務上...... 我真係吾知以後仲有無精神砌模型. 總感覺好像將要停止了這嗜好. 到時關掉工作室搬番晒番屋企? 不過肯定無空間去噴油. 要去時租? 我真係吾知. 總之係最後呢段時間, 有to do list就去做一次先啦. 回想這幾3年多的時間, 我砌左100多盒模型, 也完成了KOG, 真係好開心. (隻1/100 LED未KO wor, 吾通佢就係我的遺憾?), 我知自己未到家, 只係一味上色, 不過我真係好滿足!
PS : 我會努力砌HＧ狗係２９／１０交功課！ 雖然我訂個盒仲未到， 出去買一盒先啦！
Full Size Photo link :
https://photos.app.goo.gl/49YkSdQDNrzfMuSZA
#SCOPEDOG, #裝甲騎兵
分享
