KOG - IMS
最近好像一個小朋友般, 砌模型砌到氣餒, 發脾氣, 又因為一盒期待已久的模型突然到來而歡天喜地, 連續幾晚開夜車剪件, 磨件, 噴油. 都幾十歲人, 仲因為一盒模型影響情緒, 諗落好幼稚, 不過其實好幸福. 人大左, 可以因為一件事而由心底開心起來是極不容易的.
這盒令我開心到爆的模型是IMS的KOG. 由見Volks確定開售日期, 我不停周圍訂貨. 總之有得訂就訂. 結果一共訂左5盒. 當我等待12/12正式發售日, 期望日本儘快寄貨的時候, 竟然係香港見到有11/22發售的會場現貨. 二話不說即刻聯絡賣家, 儘早交收了. 交收了之後都即晚開盒睇說明書. 由於太突然, 之前的計劃全被打亂. 製作中的LED也被迫暫停.
經過左2個多星期的努力, 對新呢盒的KOG也有點感想. 先說好的一方面. 外型不用多說, 一如IMS系列的好, 外型上可以挑剔的地方吾多, 接近完美. 係模型的設計上有好多新意思, 例如膊頭位的鬆緊用螺絲收緊, 另外股關節用螺絲吾係為左鬆緊, 係因為個受力位, 好難痴死, 用螺絲收死方便好多. 仲有之前我砌到想死的裙甲掛上條腰的接合位, 今次用了小圓樁位, 咁方便痴死, 吾會痴完又跌. 大腳都係, 用了高達式的接合方式, 雖然佢的目的吾係令你吾駛用膠水, 不過真係好痴好多. 前幾盒試過痴歪晒. 另外部份之前LED好難整的位, 例如腳踝的甲. 小腳背面的裝甲等, 今次用了一件過的件, 可以說易砌好多. 由於部份骨架係用LED的模, 砌的時候係完全感受到當中的分別. 可以說, 好感受到IMS對照顧模型新手在設計上的進步.
另一方面, 有幾樣野依然係好令人不滿. 第一, 好多水口位都係當眼位, 佢d水口又大大粒. 打磨需要的時間比高達多好多. 第二都係關於水口, 為乜水口死要放係彎位或骨位? 咁樣好易磨走晒條骨同埋彎位好難磨. 我真心吾明為乜有人期待所謂的電鍍版. 你睇下d水口位, 吾打磨執一執真係嚇死人. 水龍都有出電鍍, 不過我搵佢成品相時, 只係搜尋到電鍍版係拍賣網站, 完全未見過成品. 第三樣好煩的係Volks真係當所有人都係專家? 頭頂的紅十字, 白色位為乜吾分件? 相反條骨有好多無謂分件, 好多係細細粒, 真係吾信佢搞吾掂個分件. 小腳, 大腳條紅線因為都係直, 做masking都相對簡單, 不過頭頂個幾個位真係難搞. 我小人之心, 真係覺得個設計師有心留番d難度係盒模型度. 費事我呢類低技術人士都可以砌到吾錯的成品. 第四樣野係如手碗附近的甲, 腰甲等可動位. 其實好鬆, 不可以固定個位. 第五樣係有幾個地方左右夾埋有高低差......條樁位對個位吾準, 最好剪走條樁先落膠水. 個幾個位包括屁股, 高跟鞋個踭(之前砌LED已經發覺), 劍柄. 劍套本身係新模, 仲要一件過. 不過條分模線好明顯, 磨完發覺有高低, 一係磨平, 一係補畢地, 一係無視.....最後一樣就係個張水貼. 吾知點解貼出來好膠.....頂吾順. 放棄了.
雖然講左咁多不滿, 但總體來說, 我覺得呢盒係模型設計上係有好大進步, 雖然未去到好似Bandai咁易砌, 不過進步左好多. 當然, 我知好多砌五星的師兄都係高手, 我口中的問題對佢地來說係基本執件, 豪無難度. 不過希望大家體諒下一眾初階的玩家.
講番製作方面. 跟書明書砌, 好順, 吾大問題. 不過有d習慣要改一改. 我以前都係剪完係咁磨, 不過自從砌五星開始我會分2個盒. 一面左, 一面右. 連插住噴件的發泡膠我都分左右. 總之左右兩邊的件吾好掉亂. 上面已經提到要注意的件, 其他件的位都好fit. 唯一改動係背後2條蘇, 原件太長. 最初諗住用一半都係太長, 結果剪到而家咁短. 如果吾係, 真係無位放. 另外, 我對持弓個做型好一般, 連弓都無砌出來.
係用色方面, 為左搵出心目中的金, 我係買齊Gaia同Mr. Color的金色去試. 噴左2個鐘左右匙更, 結論係無一隻合心水. Gaia122因長期缺貨, 用左E7的星光金去取代. 但全隻星光金又太橙. 最後自己溝油. 最搞笑係我用Mr. Color的Red Gold, 明明噴完匙更覺得好明顯的2隻色, 當我係細部件噴完時發現色差太小, 睇吾出係2隻色...... 燈光之下, 分別更小.
主體金色 : 40% 星光金 + 60% Gaia010. 出來效果超好, 不過吾夠閃. 下次可以再加光面油溝完先噴, 完成之後再噴光油當保護油
關節色 : MC215 Copper, 隻色第一次噴出來係啞面, 溝左GX100光油之後就靚晒. 不過奇怪的係我滲完線用Enamel開油水抹竟然捽走左小小.....老闆話MC呢個系列噴完要捽, 吾知有無關.... 但因為呢隻銅色真係好吸引, 建議噴完噴光油保護. 之後再搞其他野. 我係時租店噴油時, 吾止一次有人問我呢隻係乜色!
頭頂粒玉 : Gaia 124星光銅加Gaia133 Preal copper做陰影位. 本來以為個contrast係好大, 噴完同隻主體金比又吾覺.
細部金色 : 主體金之後再用Gaia133 Preal Copper補上去
紅色 : 放大鏡加手油雙星Enamel X7, 貪佢衰左都可以抹走佢. 頭頂紅色Logo, 腳的紅線, 周圍的紅色全都係手油. 膊頭位就貼貼紙做遮蓋, 之後噴X7. 跟手放大鏡加尖頭綿花棒抹.
劍方面, 劍身用左一隻鞋面深灰銀色做劍背, 光滑面的銀做劍身, 劍柄用2隻金色.
最後就係頭頂的浮雕, 之前用雙星X1, 吾係好上色, 聽師兄講可能要油好多次. 最後買左支淺灰白色的Arclic油. 都係放大鏡加手震震咁油. 膊頭本身包住紅色的白邊就放棄了.
最後係水貼. 我特意係主體貼上花紋的金水貼. 可能睇相吾明顯, 但正正係若隱若現先至正. 如果用好明顯的水貼如黑色, 好似魔化左咁. 但用金色吾明顯反而增加detail之餘又吾搶. 配合本身已經係金色同永野大神本身浮誇的設計, 我自己覺得好match, 好滿意呢個設計.
我本人非常滿意今之的成品, , 金, 銅, 2隻主色完全係心目中的顏色. 手油白, 紅等亦比想像好. 即使用手機影, 出來的效果都好好, 放係攝影棚入面打晒燈隻KOG更金, 雖然自己技術未到家, 部份位置打磨得吾夠滑, 夾口補得吾好, 條骨吾直等....總之整個過程順利愉快完成, 我終於完成了第一隻KOG.
[ 本帖最後由 ngszewai 於 2020-12-15 02:21 AM 編輯 ]
附件: 您所在的用戶組無法下載或查看附件
|