ngszewai
少校
UID 4770
精華
32
積分 164
帖子 2328
成品數目 164 件
閱讀權限 10
註冊 2005-9-17 來自 HK
狀態 離線
|
|
RG - MSZ-006 Zeta Gundam
話說上次砌完HG 百式之後, 稍稍休息了1~2天, 腦中又開始想下隻砌邊盒好. 最後選擇了Zeta, 因為百式, MK-II同Zeta係一齊的. 另外因為好多顏色件數小, 索性SD同RG一齊砌.
RG Zeta係一出的時候就買左, 當時諗住素組, 但一拎出來, 太多件, 於是又收番埋. 一收就幾年. 我已經忘記了我原來床下有呢盒模型. 砌完SF之後又想砌下RG, 於是又上2手網, 入左幾盒RG, 前幾日執野時先知原來已經有..... 而家SF, MK-2, Z, Red Zaku各有2盒......年紀大了, 記不清自己買了什麼, 成日吾小心重複買了. (RG我無心砌2次, 因為實在太折磨)
正式開工之後, 可以說是災難. 已經有心理準備知道分件小而且細. 不過同SF相比, Zeta實在多很多件!!!!! 黃色與藍色件還算正常, 白色跟淺灰色也在正常範圍之內, 紅色同黑色件則開始發覺很多部份跟本吾知係邊. 到 之後最災難是深灰色關節件. 灰色的件數之多與細...睇見都暈. 最慘係跟本睇吾出件parts係純內關節定有見光位, 逐粒剪完出來之後打磨, 有好多細到連搵個位夾噴油夾都無. 單單一排灰色剪同磨已經係2個小時以上. 除了開住音樂, 邊磨邊聽下歌, 都吾知可以點. 因為不停打磨實在太悶, 我係磨下, 噴下幾隻色, 又再磨下, 噴下咁砌. 花了幾晚, 先可以完成全部打磨工作.
第一隻完成的是黃色. 用白油打底, 之後噴高達專用黃色油, 再噴橙色做陰影. 無錯, 係咁細粒都打陰影色. 但當完成黃及藍之後, 發覺極為不襯. 最後全噴回橙. 吾噴陰影了, 吾知應該用乜色做陰影. 有想過用透明橙或紅加深顏色, 未實測. 太累了.....
第二隻處理的是紅色. 同樣用白油打底, 之後噴高達專用桃紅色油. 陰影用一隻用剩的鮮紅金屬油. 同以前一樣, 陰影若有若無. 但完成後本來的桃紅色受陰影色影響變得鮮色了, 如今看來更像鮮紅色了. 可能本身陰影色同主色差距吾夠大, 紅色噴親陰影都吾係太滿意.
第三隻噴的係藍色. 用高達專用粉藍油, 係略帶紫色的. 本身隻油太粉色了, 所以特登吾上白底, 係藍色件上直噴. (懶就懶啦, 仲懶有道理) 噴出來效果吾錯, 好靚. 之後用一隻鮮藍色做陰影. 同紅色一樣, 陰影吾明顯. 一上陰影色隻色變得深色左. 雖然出來吾係本身所構思, 但效果吾錯.
第四隻白色係Mr. Hobby 107, 陰影係灰色油. 正正常常, 係白色上面噴陰影的掌握已經比較好. 出來效果好滿意
第五隻色係淺灰的白色分件. 初初噴完, 覺得出來顏色同白色太近. 加多小小黑色再噴. 打埋陰影. 噴個時覺得好適中, 但夜晚睇又太深色了......但陰影的控制都吾錯.
之後個一晚, 實在忍吾住想砌起小小來睇下, 另一方面不停同自己講灰色應該係收埋, 吾見光架... 於是將身, 手, 腳都砌起....發現都幾多見光......算了, 反正我噴的都係好接近的色. 拆又驚整爛. 吾拆了.
跟住個晚終於可開噴油, 用左高達專用油隻深灰做機翼. 中灰做高光. 效果吾錯.
其實今次噴陰影同以往的手法有吾同. 以前會圍住外圍噴陰影色, 中間係主色. 今次會依光的方向, 即係向光的位置無點噴陰影色, 越遠離光源越深. 噴完陰影, 最後再依光源的位置輕噴主色, 順方向一下一下噴落去, 輕手的噴. 但問題來了, 係噴時有好多小件係吾知邊邊係向上的.....所以有些小件的陰影係上方.........至於滲線則全部用啡色. 整體來說, 我本人都滿意件成品. 係淺灰的白件深左小小.
買了張水貼, 好多貼紙細到.....同埋我吾鐘意RG特色, 圍個框係周邊, 我覺得好奇怪.....於是要不停自己諗點貼. 搞左2小時都只係搞掂機翼.....另外銀色水貼貼係白色都幾好睇. 平時吾顯眼, 某d角度反光先見到.
講完上色, 講番盒模型本身. 比例, 外型都好好. 刻線雖多, 可能我用啡色滲線, 未覺太亂. 但呢盒模型有個好大問題, 為左要變型, 好多地方係硬直. 最大影響係膊頭, 吾可以向後拗, 擴胸的動作做吾到. 之後係對腳. 首先前裙甲同側甲係靠一小支撐點由大腿支撐. 正常站立時前甲經常下沉. 腰部安裝完全係憑感覺同埋腰過幼. 當我想擺出不同動作時, 好多地方跟本屈吾到. 其實對我來說, 我跟本吾會變做飛機, 我情願佢出一個純MS版, 增加可動性. 雖然係咁, 但總括來說, RG Zeta係一盒值得推介的模型. 睇完RG你就會覺得HG相對真係素了一點.
Full Size Photo :
https://photos.app.goo.gl/kDEwf9FQeTvZSvoPA
[ 本帖最後由 ngszewai 於 2020-7-24 02:15 AM 編輯 ]
附件: 您所在的用戶組無法下載或查看附件
|
FaceBook Album :
https://www.facebook.com/profile.php?id=100050400941878
相片集
https://photos.app.goo.gl/1prkL2BYZJxV4WEv7
|
|
|