RG Strike Freedom
第一次認真的砌RG. 我選了SF. 原因是想將呢盒用色做參考, 準備之後的PG. 雖然以模型本身去評論, 呢盒係非常出色, 無論分件, 外形比例, 設計都係非常高水準, 但我估大家睇呢盒的成品都睇到滯. 因為件件都差吾多.
在開始之前, 上網找了很多完成品去參考, 發現好多完成品都無上色. 上色的完成品中, 我特別喜歡其中一個粉色的作品.
想了又想, 到底應如何去組裝, 成排噴之後再剪?磨完再噴? 一件一件來? 最後跟據顏色, 一件一件剪, 磨, 再噴. 開始的時候也會望下係邊度的件, 見吾見光, 最後大腦放空, 剪, 磨, 噴. 不想了.
剪跟磨一排件也差不多要2小時, 上色加開檔又2小時. 很多件細到跟本挾吾到, 要用雙面膠紙痴係雪條棒噴. 又有很多件跟本吾知挾邊先可以. 總之問題天天都多. 係上色的時候, 我先處理金色. 跟番Bandai, 我用左一隻星光金, 一隻啞金. 但個條預先組裝好的骨我就無理. 砌完發覺, 都有部份外露, 下次都要噴埋好點. 星光金出來的效果好滿意, 但其實好多都吾見光......
之後我開始噴黑色. 單純的高達"Titan深藍". 我一點都看不出有藍, 不過佢招紙咁寫. 失敗的係我吾記得上高光! 正常來說, 可以用普通藍或透明藍, 輕噴在高光位. 但竟吾記得噴! 算了. 已組裝, 吾想拆. 跟手噴藍, 係有點小小紫的藍. 噴係藍底色上係沉左色, 所以吾覺有紫的感覺. 之後陰影係用深藍色. 但補主色時差吾多遮蓋晒, 搞到好似無噴陰影咁. 之後左右倆支炮的綠, 我用左"intermediate blue", 吾太綠, 睇落OK. 紅色情況同藍色類似, 我已儘量係大小小的件上面都噴陰影, 不過真係太細粒, 結果噴完再補主色時已全部不見了.....(我上陰影係主色, 陰影色, 主色) 搞到很氣餒, 好似白忙一場咁.
最後開始攪白色, 特地去買樽淺灰, 開始噴時覺得吾夠灰, 又加左小小黑油. 噴完, 同白件有小小吾同. 跟住噴陰影, 噴完之後真係好難分白同灰. 因為上完陰影, 本身白件都會深色左. 好似又係白忙一場. 色塊的效果很小, 不明顯, 有明顯分別的地方又覺得係噴油失敗的鴛鴦色....最後, 好多地方補番白油, 拉近2隻色. 經過今次, 可能下隻RG要噴白同灰時都會統一. 一係吾用陰影, 一係吾用色塊.
滲線又係另一個災難. 我一向用半光澤油. 吾知點解今次問題比平時更特顯, 就係滲吾到線.....一點滲線油已經化開晒. 好明顯係好似係啞面滲線咁. 之後抹又抹餐死, 條線淡到好似無滲咁. 上網search過, 有人教要先噴光面, 滲完再噴半光澤. 之前其實無試過噴保護油, 通常直上半光澤. 定應該刻深條線?
之後要貼貼紙, 一隻SD都可以貼成80張, 我估呢盒吾會小過100張......第一晚貼左3個鐘, 只係完成左龍騎! 一貼就8條, 前後加埋16張貼紙, 貼到自己好似機械人咁. 單單龍騎系統已經63張! 第2晚貼完上半身, 第3晚完成埋對腳. 一方面我吾想太多貼紙會太花, 但貼完又覺得好靚....真係矛盾. 我其實有好多都貼係吾當眼的地方, 增加detail又吾想一眼望落已太花.
總結成個經驗, 一方面讚嘆Bandai做模型的實力, 一方面覺得RG好難做. 本身分件好好, 好仔細, 但噴油真係好為難, 好細件, 有點難處理. 之後滲線, 貼貼紙都好煩瑣. 砌完成隻RG, 個感覺係"咪同網上的素組加消光"差吾多! 個種上完色之後令人驚艷的感覺吾太明顯. 盒件真心講設計係非常好, 睇到悶係另一回事. 但砌的人又真係辛苦, 不停重覆搞一樣的龍騎, 睇到眼都矇的細件, 完成一盒RG原來都好多功夫. 想砌下模型又吾想上色的朋友, RG真係好適合, 砌完, 貼紙, 消光已經有非常不錯的水準.
 附件: 您所在的用戶組無法下載或查看附件
|
分享
