因為行業關係, 每年新年放假都一定放到初八, 九先開工. 假期流流長又無去旅行, 最好就係留係屋企砌車喇
今次拎左盒買落N年既龍記保時捷獵虎開刀. 由於大把時間, 唔洗再玩幾日鮮, 可以花多D時間係考證同製作上面.
先講講考證
今次設定為653重戰車營既"314"號車, 事實上保時捷獵虎只生產了11輛, 當中就得兩部係無防磁(生產編號為305011同305012), 而兩部無防磁既保時捷獵虎就只有653重戰車營既 "314" (即係生產編號305012) 有相留下, 所以無咩選擇之下就揀左佢
314號獵虎係1945年3月16日零晨4:30分係德國MORSBRONN同另一輛332號獵虎由自己人自爆放棄. 而今次我設定係該車係自爆前既最後狀態, 所以主要參考下面兩幅美軍影既照片
講完設定背景, 講下製作過程.
模型無咩點大改動, 主要係參考實車將全車每部份零件既焊接線用AB畢地加上, 由於數量都幾多下, 所以位置不能盡錄. 而車上的掛具扣就用膠條同換左PE.兩側後備履帶就用以前剩餘既金屬履帶修改後加上. 由於保時捷獵虎既履帶每隔只有一個固定齒, 印象中無牌子有出過. 所以只能用番原件.
由於按實車照片製作, 所以細節同佈置上都盡量跟番照片, 如下面紅圈的位置, 留意佈局
炮盾的鑄造數字係右手面, 自行加上, 另外車頭燈同機槍都無左
另外同車較早期影既照片, 都同樣值得參考, 例如314號車係使用後期炮鎖, 但車身前上方裝甲當時並未設有炮鎖固定具
模型組合大致完成, 呢兩日開始上色